इलाम नगरकपको उद्घाटन खेलमा वडा नम्बर १२ विजयी

इलाम पौष २५ :
इलाम नगरपालिका स्तरीय फूटबल प्रतियोगिता सोमबारबाट इलाममा सुरु भएको छ । प्रतियोगिताको उद्घाटन खेलमा इलाम नगरपालिका वडा नम्बर १२ ले बिजयी सुरुवात गरेको छ । इलामको ठुलो टुडिखेलमा संचालित प्रतियोगितामा वडा नम्बर २ सुम्बेकलाई १–शुन्यले पराजित गरेको हो ।
पहिलो हाफमा दुबै वडाले गोलरहित बराबरि खेलेको थियो । दोस्रो हाफमा वडा नम्बर १२ का लिम्बूले गरेको एकमात्र गोल नै निर्णायक बन्न पुग्यो । खेलमा दुवै वडाले गोल गर्ने केही सुन्दर अवसर पाएपनि गुमाएका थिए । अब वडा नम्बर १२ ले पुष २९ गते वडा नम्बर ९ को सामना गर्नेछ । आजको प्रतियोगितामा दिनेश लिम्बू नै म्यान अफ दि म्याच समेत घोषित भए ।

मंगलबार वडा नम्बर ७ र वडा नम्बर ११ बीच प्रतिस्पर्धा हुदैछ । प्रतियोगितामा नगरका १२ वटै वडाले सहभागिता गरेको छ । यस प्रतियोगिताको बिजेताले डेढलाख र उपबिजेता टिमले ७५ हजार रुपैंयाँ सहित ट्रफि, मेडल र प्रमाणपत्र प्राप्त गर्नेछ ।यस्तै दुई सेमिफाइनलिस्ट टिमले नगद २५÷२५ हजार रुपैंयाँ प्राप्त गर्नेछ । प्रतिगोगिताको फाइनल खेल माघ ७ गते हुने आयोजक इलाम नगर खेलकुद बिकास समितिले जनाएको छ ।

कोभिड महामारी पछि सुस्ताएको खेल क्षेत्र व्युउताउदै जिल्लामा उत्कृष्ट फूटबल टिम बनाउने आयोजकको उदेश्य छ । यो तेस्रो संस्करणको ‘नगर कप’ प्रतियोगिता हो ।

प्रतियोगिताको उद्घाटन इलाम नगरपालिकाका मेयर केदार थापाले गर्नु भएको थियो । राष्ट्रलाई चिनाउने खेलकुद क्षेत्र महत्वपूर्ण रहेको भन्दै मेयर थापले इलामको फूटबल खेलसंगै अन्य खेलको बिकासका निम्ति इलाम नगरपालिकाले सक्दो सहयोग गर्ने प्रतिबद्धता जनाउनुभयो ।