मदरटेरेसा विरुद्ध १४ गोल गर्दै एपीएफ महिला गोल्डकपको सेमिफाइनलमा

इलाम फागुन २० :एपीएफ क्लब काठमाडौ दोश्रो अन्तराष्ट्रिय आमन्त्रण महिला गोल्डकपको सेमिफाइनल प्रवेश गरेको छ । क्लब ओएसिसको आयोजनामा इलामको ठूलो टुडिखेलमा मंगलबार भएको खेलमा मदरटेरेसा फुटबल क्लब युपी भारतलाई १४ – १ गोलको फराकिलो अन्तरले पराजित गर्दै अन्तिम चारमा पुगेको छ ।
एपीएफका तर्फबाट रस्मी घिसिङको डबल ह्याटि्रक , अनिता बस्नेतले ५ गोल , अनिता केसी , मनमाया दमाई र कुसुम खतिवडाले १ / १ गोल गरिन ।
मदरटेरेसा भारतको तर्फबाट प्रतीक्षा क्षेत्रीले १ गोल फर्काइन ।
नेपाली राष्ट्रिय टिमका खेलाडीले भरिएको एपीएफ र भारतको मदरटेरेसा बीचको आजको खेल पहिलो हाफको केही मिनेट प्रतिस्पर्धात्मक रहे पनि त्यस पछि एपीएफले दबाबमा राख्यो र लगातार गोल गर्यो ।
आजको प्लेयर अफ द म्याच रस्मी घिसिङ बनिन उनले नगद ५ हजार प्राप्त गरिन ।
फागुन २४ गतेसम्म सञ्चालन हुने प्रतियोगितामा नेपाल र भारतका गरी आठ टीम सहभागी भएका थिए ।   नेपालको विभागीय टिमहरू त्रिभुवन आर्मी फुटबल क्लब, एपीएफ फुटबल क्लब र नेपाल पुलिस फुटबल क्लब  ,  पदमा स्पोटिङ क्लब ओखलढुङ्गा, बागमती युथ क्लब सर्लाही, आयोजक क्लब ओएसिस , भारतको मानेभञ्ज्याङ फुटबल क्लब र मदरटेरेसा फुटबल क्लब सहभागीता जनाएका छ्न ।  
प्रतियोगिताको विजेताले नगद ४ लाख र उपविजेताले २ लाख नगदसहित ट्रफी, मेडल र प्रमाणपत्र प्राप्त गर्ने आयोजकले जनाएको छ । 
भोलि हुने पहिलो सेमिफाइनल खेल आयोजक र त्रिभुवन आर्मी क्लब बीच हुनेछ ।