कृषि ऐनमा सन्दकपुर पहिलो

Share This
  •  
  •  
  •  
  •  
  •  
  •  
  •  
  •  
  •  
  •  
कृषि ऐनमा सन्दकपुर पहिलो

इलाम । स्थानीय सरकारले कृषि ऐन निर्माण र लगानीमा चासो नदिएको गुनासो बढि रहेको बेलामा इलामको सन्दकपुर गाउँपालिकाले कृषि ऐन निर्माण गरेको छ । सन्दकपुर गाउँपालिका साविक मेची र कोशी अञ्चलकै पहिलो कृषि ऐन बनाउने जिल्ला बनेको छ ।

कृषकसंग स्थानीय सरकार भन्ने नारा रहेको गाउँ पालिकाको छैटौ गाउँ सभाले ऐन पारित गरेको प्रवक्ता गिरीराज खनालले जानकारी दिए । गाउँपालिकाले वर्गिकरण सहितको किसान परिचय पत्र वितरण लगायतका कार्यक्रम समेत अघि बढाउनका लागि ऐन निर्माण गरेर अघि बढेको उनले बताए ।

गाउँपालिका अध्यक्ष राईले किसाको व्यवसायीक हितका लागि ऐन निर्माण गरेर काम अघि बढाएको बताए । राष्ट्रय कृषक समूह महासंघ इलामको प्राविधिक सहयोगमा ऐन निर्माण गरेको खनालले जानकारी दिए ।

इलामका सबै स्थानीय तहमा कृषि ऐन निर्माणका लागि महासंघले पहल गरिरहेको महासंघका इलाम अध्यक्ष विष्णु दुलालले बताए । उनले भने ‘साविक मेची र कोसी अञ्चलमै कृषि ऐन बनाउने सन्दकपुर पहिलो स्थानीय तह भएको छ ।’ ऐनमा परिचय पत्र वितरण, करार खेती, गैर सरकारी सस्था संगको सहकार्यमा कृषिलाई व्यवसायीक बनाउने लगायतका विषय समेटीएको खनालले बताए ।

इलामको फाकफोकथुम, इलाम नगरपालिका लगायतमा पनि ऐन निर्माणका लागि छलफल शुरु गरेको महासंघले जनाएको छ । फाकफोकथुम गाउँपालिकाका प्रमुख प्रशासकिय अधिकृत रेशनाथ दहालले कार्यविधि मार्फत अघि बढ्दा कानुनी जटिलता देखिएकाले ऐन निर्माण गरेर अघि बढ्नु राम्रो हुने बताए । उनले भने ‘त्यो गाउँ सभाको विषय हो तर ऐन बनाएर अघि बढ्दा राम्रो हुन्छ । फाकफोकथुम गाउँपालिका ३ का वडाअध्यक्ष राजन पौड्यालले कृषि ऐन निर्माणका लागि काम शुरु भएको बताए ।
इलाम नगरपालिकाकी उपमेयर शुशिला नेम्बाङले खास कृषकले कृषि अनुदान लगायतका सुविधा नपाएकाले कानुनी वनाएर नियमन गर्न प्रयास गर्ने बताइन् । इलामका ६ गाउँपालिका र ४ नगरपालिका मध्ये सन्दकपुरले जिल्लामै पहिलो कृषि ऐन निर्माण गरेको महासंघका जिल्ला सहसचिव नेत्र पराजुलीले जानकारी दिए । स्थानीय तहले कार्यविधिकै भरमा कृषि अनुदान लगायतका कार्यक्रम सञ्चालन गर्दै आएका छन् ।