पहिरो पीडित दिदीबहिनीलाई आनन्द गणेश महिला समूहको आर्थिक सहयोग

इलाम, कात्तिक १९। गोकर्णेश्वर नगरपालिका–८, आनन्दनगर, काठमाडौँस्थित आनन्द गणेश महिला समूहले इलामको माईजोगमाई गाउँपालिका–६, प्याङ्गकी स्मृति सोङ्मी र आकृती सोङ्मीलाई ३१ हजार रुपैयाँ आर्थिक सहयोग हस्तान्तरण गरेको छ।

उक्त सहयोग रकम सूर्योदय नगर उद्योग वाणिज्य संघ, इलाम मार्फत हस्तान्तरण गरिएको हो। संघका उपाध्यक्ष दिपेश शाहाले आफन्त गुमाएका दिदीबहिनीको हातमा सहयोग रकम हस्तान्तरण गरेका थिए।

समूहकी सदस्य रमा शर्माका अनुसार बाढी–पहिरो पीडित परिवारका लागि सानो सहयोग भए पनि यसले ठूलो मनोबल दिने विश्वास लिइएको छ। उनले भनिन्, “यो रकमले पीडित दिदीबहिनीको घाउमा अलिकति भए पनि मल्हम लगाउने आशा गरेका छौं।”

परिवारसहित आफन्त गुमाएका दिदीबहिनी अहिले इलाम सदरमुकाममा आफन्तकोमा बस्दै आएका छन्। ११ वर्षीया स्मृति सोङ्मी र १५ वर्षीया आकृती सोङ्मी अहिले सदरमुकाममै रहेर विद्यालय जान थालेका छन्।

घटना अघि प्याङ्ग माध्यमिक विद्यालयको कक्षा ७ मा अध्ययनरत स्मृति अहिले सदरमुकामको गृनभ्याली एकेडेमीमा पढाइ अघि बढाउँदै छिन् भने आकृती आदर्श माध्यमिक विद्यालय, इलाममा कक्षा १२ मा अध्ययनरत छिन्।

परिवारका पाँच जना सदस्य गुमाउँदा स्मृती र आकृती मात्र जोगिएका थिए। साँझ सुतेका बेला आएको पहिरोले उनका बाजे ८२ वर्षीय बर्मलाल सोङ्मी, बोजु ७० वर्षीया बुद्धमाया सोङ्मी, बुबा ४६ वर्षीय धनबल सोङ्मी, आमा ४२ वर्षीया सरला सोङ्मी र १४ वर्षीया बहिनी प्रकृति सोङ्मी ज्यान लिएको थियो ।

इलाममा हालै आएको भीषण बाढी–पहिरोका कारण दर्जनौं परिवार विस्थापित भएका छन् भने कयौंले आफ्ना आफन्त र सम्पत्ति गुमाएका छन्। राहत तथा सहयोगका कार्यक्रमहरू स्थानीय संघ–संस्थाहरूको पहलमा निरन्तर भइरहेका छन्।