निगरानी
इलाम : जयनेपाल प्रतिभा प्रोत्साहन प्रतिष्ठान इलामले यस वर्ष ८ जनालाई सम्मान गर्ने भएको छ । प्रतिष्ठानले विभिन्न विधाका सम्मान तथा पुरस्कारहरूको घोषणा गरेको छ।
समाजका विभिन्न क्षेत्रमा योगदान पुर्याउने ८ जना विशिष्ट व्यक्तित्व तथा प्रतिभाहरूलाई नगदराशि सहित सम्मान गर्ने निर्णय गरेको प्रतिष्ठानका सचिव विमल वैद्यले बताउनु भएको छ ।
आगामी मंसिर २७ गते इलाममा एक विशेष समारोहमा पुरस्कार तथा सम्मान प्रदान गरिने जनाइएको छ ।
प्रतिष्ठानले घोषणा गरेअनुसार यस वर्षको सर्वाधिक राशिको ‘पूर्णटुङ्ग आदर्श नागरिक सम्मान’ अग्रज व्यक्तित्व कुलबहादुर गुरुङलाई प्रदान गरिने भएको छ। यो सम्मानको साथमा ७७ हजार ७७७ रुपैयाँ पनि प्रदान गरिनेछ।
यस्तै, समाजसेवा तर्फको ‘गजराज खम्बा सिंह जानुकादेवी आदर्श समाजसेवी सम्मान’ ५१ हजार १०१ रुपैयाँसहित खगेन्द्र प्रसाद ढकाललाई प्रदान गर्ने जनाइएको छ ।
प्रतिष्ठानले साहित्य तथा सिर्जना तर्फको ‘कृष्ण विनोद इलाम सिर्जना सम्मान’ (५१ हजार १०१ रुपैयाँ) गायक कुवेर राईलाई र कृषि क्षेत्रमा उत्कृष्ट योगदान पुर्याएबापत ‘उदयरत्न सावित्री उत्कृष्ट कृषक सम्मान’ (५० हजार १०१ रुपैयाँ) टेकप्रसाद खनाललाई प्रदान गर्ने भएको छ।
शिक्षा र शिक्षण पेसामा समर्पित व्यक्तित्वहरूलाई पनि प्रतिष्ठानले समेटेको छ। जसअनुसार जगत बहादुर लिलादेवी देवकुमारी शिक्षक सम्मान (३३ हजार ३३३ रुपैयाँ) उमाराम प्रसाईलाई प्रदान गरिने भएको छ।
भृकुटी शिवमाया लक्ष्मण अग्रणी महिला सम्मान (३३ हजार ३३३ रुपैयाँ) चन्द्रकला राईलाई प्रदान गर्ने प्रतिष्ठानले जनाएको छ । रामहरि नारायण प्रसाद शिक्षा सम्मान (१५ हजार १०१ रुपैयाँ) छत्र तामाङलाई प्रदान गरिने भएको छ।
त्यसैगरी, विद्यार्थीलाई प्रोत्साहन गर्ने उद्देश्यले राखिएको ‘मधुजनक उत्कृष्ट विद्यार्थी सम्मान’ आदर्श माध्यमिक विद्यालय इलामका समिक्स राउतलाई प्रदान गरिनेछ। उनलई १० हजार १०१ रुपैयाँ र सम्मान पत्र प्रदान गरिने सचिव वैद्यले जानकारी दिए।
प्रत्येक वर्ष प्रदान गरिँदै आएको यो सम्मानले जिल्लामा विभिन्न क्षेत्रमा योगदान पुर्याउने ब्यक्ति तथा क्रियाशील प्रतिभाहरूलाई हौसला प्रदान गर्ने उदेश्यले सम्मान गर्दै आएको छ। प्रतिष्ठानले समाजमा विशेष योगदान पुर्याए पनि ओझेल रहेका व्यक्तिको तथा ख्यातिप्राप्त व्यक्तिलाई योगदानको कदर गर्दै नगद सहित सम्मान गर्दै आएको छ ।
निगरानी
प्रतिक्रिया