इलाम नगरपालिकाको बजेट एक अर्व १४ करोड ३४ लाख

इलाम नगरपालिकाले आगामी आर्थिक वर्षका लागि एक अर्व १४ करोड ३४  लाख १३ हजार रुपैयाँको बजेट सार्वजनिक गरेको छ ।  इलाम नगर सभाको  १७औं अधिवेशनमा उपप्रमुख विष्णु दाहालले मंगलवार उक्त बजेट प्रस्तुत गर्नु भएको हो ।
आगामी आर्थिक वर्ष ०८२/०८३ का लागि पेस गरिएको बजेटमा प्रशासनिकतर्फ कुल बजेटको १३ प्रतिशत, पूर्वाधारमा २० प्रतिशत, सामाजिक विकासमा ५६ प्रतिशत, आर्थिक विकासमा ६ प्रतिशत, सुशासनतर्फ ४प्रतिशत, वन–वातावरण र विपदमा एक प्रतिशत, वित्तीय व्यवस्थामा २ प्रतिशत विनियोजित गरिएको छ । 
उपप्रमुख दाहालले चालु आर्थिक वर्ष ०८१/०८२ मा  संघीय र प्रदेश सरकारमार्फत आएको समानीकरण, समपूरक अनुदान शीर्षकका खर्च भइनसकेको बजेट आयमा राखेर आगामी आर्थिक वर्षको बजेट निर्माण गरिएको बताइन् । दाहालले चालु आर्थिक वर्षमा चालुतर्फ ६९ प्रतिशत र पुँजीगततर्फ २९ प्रतिशत खर्च भइसकेको बताउनु भयो । दाहालले आगामी बजेटमा समेट्न नसकिएका महत्वपूर्ण र ठूला योजनालाई योजना बैंकमा राखेर प्रदेश र संघीय सरकारबाट प्राप्त हुने बजेटमा समावेश गर्ने लक्ष्य रहेको बताउनु भयो ।
सभामा उपप्रमुख दाहालले अर्को आर्थिक वर्ष ०८३/०८४ का लागि एक अर्ब २० करोड पाँच लाख ८३ हजार ६ सय ५० रुपैयाँ प्रक्षेपण सभामा प्रस्तुत गर्नु भयो। चालु आर्थिक ०८१/०८२ का लागि गएको १६औं नगरसभाले पारित गरेको एक अर्ब १३ करोड रुपैयाँको बजेट प्रदेश र संघीय सरकारमार्फत आएका विभिन्न योजनाको बजेट बढेर एक अर्ब १८ करोड रुपैयाँमा अहिले सञ्चालन भइरहेको छ ।
नगरपालिकाले आगामी आर्थिक वर्षका लागि मिसन रोजगारी, प्राङ्गारिक क्षेत्र घोषणा, नमुना कृषि कार्यक्रम, सुत्केरीलाई निःशुल्क एम्बुलेन्स, गर्भवती महिलालाई भिडियो एक्स्रेको घुम्ति शिविरलगायतका कार्यक्रम अघि सारेको छ ।