इलाम गोल्डकप : पहिलो सेमिफाइनलमा आज  मछिन्द्र  र  पथरी ११ भिड्दै

सविता पाण्डे , इलाम , ९ बैशाख :

इलाममा जारी तेस्रो अन्तर्राष्ट्रिय आमन्त्रण इलाम गोल्डकपको पहिलो सेमिफाइनल खेलमा आज  मछिन्द्र  फुटबल क्लब काठमाडौ र पथरी–११मोरङ  भिड्दैछन् । मछिन्द्रले पाहुना टोली एन पेनाङ मलेसिया टाइब्रेकरमा ३–२ गोल अन्तरले पराजित गरि सेमिफाइनलको यात्रा तय गरेको थियो । पथरीले घरेलु टिम रेडहर्स फुटबल क्लबलाई  टाइब्रेकरमा ४–२ गोल अन्तरले पराजित गर्दै  पथरीले अन्तिम ४ मा स्थान बनाएको हो ।
रेडहर्स फुटबल क्ल्बको आयोजनामा इलाम स्थित ठूलो टुडिखेलमा जारी प्रतियोगिताको पहिलो सेमिफाइनल खेल दिउँसो २:३० बजे सुरु हुने आयोजकले जनाएको छ ।
भोलि हुने दोश्रो सेमिफाइनल खेलमा डिफेन्डिङ च्याम्पियन  न्युरोड टीम (एनआरटी)ले रोलिङ क्लब धुलाबारी झापा संग प्रतिस्पर्धा गर्नेछ । रोलिङले क्वाटरफाइनलमा पाँचथर फुटबल  क्लबलाई  ३–० गोल अन्तरले हराउँदै अन्तिम ४ मा स्थान सुरक्षित गरेको थियो ।  चित्लाङ फुटबल क्लबलाई १ – ० ले पराजित गर्दै एनआरटीले  सेमिफाइनलको यात्रा तय गरेको हो ।

बैशाख ५ गतेदेखि सुरु भएको प्रतियोगिताको  १२ गते फाइनल खेल हुनेछ  । रेड हर्ष फुटबल क्लबद्वारा आयोजित  प्रतियोगिताको  विजेताले नगद  १० लाख र उपविजेताले नगद  ५ लाख प्राप्त गर्नेछन् ।