इलाम बैशाख २१ इलाम सदरमुकाम बजार क्षेत्रमा बुधबार देखि सर्वसाधारणलाई निस्कन निषेध गरिएको छ ।इलाममा कोरोना संक्रमण बढे सगै कोभिड – १९ संकट व्यवस्थापन केन्द्रले इलाम नगरपालिका ७ टुडिखेलदेखि जिरो किलोमिटर तथा जिरो किलोमिटर देखि धोबीधारा क्षेत्रका सर्वसाधारणलाई बैशाख ३१ गते सम्म अत्यावश्यक काम बाहेक बाहिर निस्कन नदिने गरि आवागमन बन्द गर्ने निर्णय गरेको छ । बजार क्षेत्रमा जाने सवारीलाई पनि कडाइ गरिएको छ । जिरोकिलोमिटर र धोबिधारा बाट बजार परिसरमा अत्यावश्यक बाहेक अन्य सवारीसाधन संचालन गर्न नदिने जनाएको छ । मेची राजमार्गमा भने सवारी संचालन हुने छ भने मेची राजमार्गमा पर्ने विल्याँटे बजारमा लामो दूरीका सवारी रोक्न नदिने केन्द्रको निर्णय छ ।
मंगलबार इलामस्थित पूर्वेली जीपतथा ट्याक्सी व्यवसायी संघले वैशाख २२ गतेदेखि जिल्ला भरिका आफ्ना सबै काउन्टर एक हप्ताका लागि बन्द गर्ने निर्णय सार्बजनिक गरेको छ । संघले यातायात व्यवसायीलाई अत्यावश्यक काम बाहेक सवारी सञ्चालन नगर्न अनुरोध गरेको छ ।
इलाम उद्योग वाणिज्य संघले पनि मंगलबार एक विज्ञप्ती जारी गर्दै विहान सात बजेदेखि विहान दश बजे सम्ममात्र पसल व्यवसाय सञ्चालन गर्न व्यवसायीलाई अनुरोध गरेको छ । इलाममा हालसम्म ७१ जनामा कोरोना पुष्टि भएको छ भने चार जनाको मृत्यु भैसकेको छ ।
