इलाम जेठ १४ । उपचार खर्च तिर्न नसक्दा अस्पतालमा बस्न बाध्य इलामका सरोज गदाल घर आईपुगेका छन् ।
सुर्योदय नगरपालिका ९ का गदाल गएको बैशाख २५ गते कोरोना संक्रमण भएपछि उपचारका लागि झापाको विर्तासिटी अस्पताल भर्ना भएका थिए ।संक्रमण मुक्त भएका गदालले उपचार बापतको रकम अस्पताललाई बुझाउन नसक्दा एक सातादेखि अस्पतालमा थिए ।
आर्थिक अभावका कारण अस्पतालमै बस्न बाध्य भएका गदालाई घर ल्याउन संचारकर्मी दिनेश महतको पहलमा फेसबुक मार्फत सरोज गदाल घर फर्काउ अभियान सुरु गरिएको थियो ।
सो अभियानमा विभिन्न ब्यक्ति साथै संघ-संस्थाहरुले आर्थिक सहयोग गरेपछि शुक्रबार उनलाई अस्पतालबाट ल्याइएको छ ।अस्पताललाई करिब डेढ लाख रुपैयाँ बुझाएपछि सरोजलाई घर ल्याउन सफल भएको महतले बताए । गदाललाई ल्याउन समाजसेवी डम्बर खड्काले निशुल्क गाडी ब्यवस्था गरेका थिए
