फाकफोकथुम गाउँपालिका उपाध्यक्ष राईद्वारा पत्रकारलाई गाली , महासङ र युनियनको आपत्ती

इलाम ,चैत २६ । स्थानीयलाई कुटपिट गरि  प्रहरी नियन्त्रणमा रहेकी फाकफोकथुम गाउँपालिका उपाध्यक्ष सरस्वती(सरु) राईले शुक्रबार थुनामुक्त भए लगत्तै पत्रकारलाई गाली गरेकी छिन ।इलामका प्रमुख जिल्ला अधिकारी माधव प्रसाद ढुंगानाको आदेशमा पाँच हजार धरौटी बुझाएर फाकफोकथुम गाउँपालिकाकी उपाध्यक्ष सरस्वती राई प्रहरी नियन्त्रणबाट मुक्त भए पछि सामाजिक सन्जाल मार्फत पत्रकारलाई हप्काएकी  हुन्। उनले पत्रकारले आम नागरिकमा भ्रम छरेको भन्दै शनिबार विहान अर्को स्टाटस लेखेर सञ्चारकर्मीलाई थर्काउने प्रयास गरेकी थिईन्।  पत्रकार गोपाल निरौलालाई  तल्लोस्तरको गालिगलोजसमेत गरेकी थिइन्। निरौलाले चित्त नबुझे कानुनी उपचारको बाटो रोज्न जवाफ दिएको बताएका छ्न ।
घटनापछि शनिबार पत्रकार महासंघ इलाम शाखाले एक बिज्ञप्ति जारी गर्दै समाचारको बिषयलाई लिएर पत्रकारलाई गाली गलौज र धाकधम्की नदिन अपिल गरेको छ। शाखा अध्यक्ष बिप्लब भटराई र सचिव भिम चापाँगाईद्धारा हस्ताक्षरीत बिज्ञप्तीमा समाचारका बिषयमा चित्त नबुझे कानुनी प्रक्रियामा जाने ठाउँ हुँदाहुँदै सामाजिक संजालमा गालीगलोज र म्यासेज लेखेरै धम्कीपूर्ण गाली गर्नु निन्दनिय भएको जनाईएको छ।

नेपाल प्रेस युनियनले विज्ञप्ति जारी गर्दै सञ्चारकर्मीमाथि जाई लाग्ने बन्द गर्न चेतावनी दिएको छ। युनियनकी अध्यक्ष सविता पाण्डे र सचिव टीका खतिवडाले जारी गरेको विज्ञप्तिमा भनिएको छ ‘जिल्लाका जिम्मेवार सञ्चारकर्मीमाथि लक्षित उपाध्यक्ष राईको प्रतिकृयाले समग्र सञ्चार जगत माथि नै धावा वोलेको अनुभूति हामीले लिएका छौं।’

पछिल्लो एक महिनादेखि फाकफोकथुम गाउँपालिका अशान्त रहेको छ। गाउँपालिकाले मौसमी कामदार कोरिया पठाउने प्रक्रियालाई पारदर्शी नगरेको भन्दै स्थानीय युवाहरु आन्दोलित छन्। फाकफोकथुम गाउँपालिका-१ का कृष्णबहादुर खड्कालाई कुटपीट गरेको जाहेरी परेपछि उपाध्यक्ष राई प्रहरीकोमा उपस्थित भएकी थिईन।