पुर्व मन्त्री बुडाथोकीको निधन

पुर्व मन्त्री बुडाथोकीको निधन

विराटनगर : नेपाली कांग्रेसका केन्द्रीय सदस्य तथा पूर्व सामान्य प्रशासनमन्त्री केशवकुमार बुढाथोकीको निधन भएको छ । ८० वर्षीय बुढाथोकीको उपचारका क्रममा सोमबार राति निधन भएको हो ।

पछिल्लो समय स्वस्थ्यमा समस्या आएपछि उनी विराटनगरस्थित विराट मेडिकल कलेज उपचार गराइरहेका थिए ।

नेपाली कांग्रेसका महामन्त्री विश्वप्रकाश शर्माले नेता बुढाथोकीप्रति सामाजिक सञ्जालमार्फत श्रद्धाञ्जली व्यक्त गरेका छन् ।
महाममन्त्री शर्माले लेखेका छन्, ‘नेपाली कांग्रेसका नेता, केन्द्रीय सदस्य, पूर्वमन्त्री केशवकुमार बुढाथोकीको उपचार क्रममा विराट मेडिकल कलेज विराटनगरमा निधन भएको छ । हक्की स्वभावका नेता बुढाथोकीको बिदाइले पूर्वी नेपाल खासगरी झापाको भूमिमा उहाँको ठूलो रिक्तता अनुभूति हुनेछ । उहाँका योगदानहरू हामी सदैव स्मरण गरिरहने छौँ। पार्टी पंक्ति, उहाँका तमाम शुभेच्छुक अनि परिवारजनमा गहिरो समवेदनासहित आदरणीय कुमार दाइप्रति भावपूर्ण श्रद्धाञ्जली !’

नेता बुढाथोकी लामो समयदेखि प्रोस्टेटको क्यान्सरबाट पीडित थिए। पछिल्लो समय मिर्गौलामा समस्या आएका कारण उपचार गराइरहेका थिए।

बुढाथोकी सामान्य प्रशासन मन्त्री, जलस्रोत सहायक मन्त्री, राष्ट्रिय पञ्चायत सदस्य, प्रधानपञ्च, जिल्ला पञ्चायत सभापति भइसकेका थिए ।

बुढाथोकीका दुई छोरा र एक छोरी छन् । नेता बुढाथोकीको पार्थिव शरीर अन्तिम श्रद्धाञ्जलीका लागि आज झापा जिल्ला पार्टी कार्यालयमा राखिने बताइएको छ । बुडाथोकीको आज नै दाहसंस्कार गरिने नेपाली काङ्ग्रेस झापाका सचिव कृष्ण हुमागाईँले जानकारी दिए ।