‘क्रियाशिल पत्रकार महिला पुरस्कार २०७८’ बाट कार्यकारी सम्पादक पुरस्कृत

इलाम बैशाख १ :
‘क्रियाशिल पत्रकार महिला पुरस्कार २०७८’ बाट निगरानी डटकमका कार्यकारी सम्पादक सविता पाण्डे पुरस्कृत हुनु भएको छ । नेपाल पत्रकार महासंघ इलामले स्थापना गरेको दश हजार रुपैयाँ राशिको पुरस्कार आज एक समारोहका बीच वितरण गरिएको छ । यसगरी क्रियाशिल पत्रकार महिला पुरस्कार २०७९ बाट इलामकी पत्रकार सुजाता सुनुवार पुरस्कृत हुनु भएको छ । नेपाल पत्रकार महासंघका केन्द्रीय सदस्य भुषण राई, प्रदेश अध्यक्ष लिला बल्लव घिमिरे र नेपाल पत्रकार महासंघका अध्यक्ष विप्लव भट्टराईले दोसल्ला, प्रमाणपत्र र चेक हस्तान्तरण गरेका हुन ।
२०६४ सालदेखि इलामको सामुदायिक रेडियो रेडियो नेपालवाणी एफएमबाट पत्रकारितामा क्रियाशील पाण्डे २०७२ सालदेखि रेडियो नेपालका इलाम संवाददताको रुपमा कार्यरत हुनुहुन्छ । पाण्डेले इलाम एक्सप्रेस दैनिक, हसना म्यागजिन , मकालु टेलिभिजनमा काम गरीसक्नु भएको छ ।

यसैगरी २०६९ देखि इलाम एफएमबाट पत्रकारितामा क्रियाशील सुनुवार उज्यालो रेडियो नेटवर्क काठमाडौंमा आवद्ध हुनुहुन्छ । क्रियाशील पत्रकार महिला पुरस्कार २०७७ सालमा स्थापना गरिएको हो । तत्कालिन पत्रकार महासंघ इलाम शाखा अध्यक्ष कोकिला ढकालको नेतृत्वमा पत्रकार महिलालाई पेशाप्रति जागरुक बनाउदै पत्रकारीता मार्फत समाजमा योगदान गर्न प्रोत्साहित गर्ने प्रयासमा पुरस्कार स्थापना गरिएको जनाइएको छ ।